الغربة والبعد

مساءوصباح الوردوالجوري
أمرتحدث عنه اغلب الشعراءوتغنوابه وفراق الأحبة من الاهل والاصدقاء وذكرالاطلال والاماكن تمردائما في ذاكرة كل مغترب وماذا يقول من فارق نجدالاحباب وغيرها من بقاع مملكتنا الغاليه وكل بلد غالية على اهلها القصيده اهداءمني لكل مغترب وخصوصا من فارق نجد (مغترب والهوى نجدي)اقول فيها:

الله يهون غربتي عنك يانجد
ويردني لك عقب طول الغيابي

ويخفف اللي بي من الهم والوجد
واشوف عقب النيل ذيك الهضابي

وأنسى معاناتي عقب لوعة البعد
وأزوردار اللي هواها غــدابي

دار المهاء ريم الغلاء باهي الخد
اللي على شانه غرامي سرابي

أم العيون السودمزمومة النهد
الضبي لامنه لمحها يهــابي

واشب ناري وأتذرى من البرد
في منحدروديانها والشـعابي

نـارالمحـبه والـوله بي توقد
واخيل براقاًغشـاه السـحابي

ياليتني وياك ياحالي الشـهد
ياللي على شانك وطيت الصعابي

تدري على كيفك ولكن تأكد
أنك دواي وعلتي مع صـوابي

محبتي لك يـاحبيبي تجـدد
وشـوقي تبين في ثنايا كـتابي

والله يهون غربتي عنك يانجد
ويردني لك عقب طول الغيابي